«Փաշինյանը պատերազմով տալու է Հայաստանի տարածքների կեսն ու շարունակի մնալ իշխանություն». քաղաքական վերլուծաբան

Քաղաքական վերլուծաբան Արմեն Բաղդասարյանը 168 TV-ին տված հարցազրույցի ընթացքում ադբեջանական կողմից հայկական դիրքերի պարբերական հրթիռակոծումը դիտարկել է որպես Ադրբեջանի կողմից լայնամասշտաբ ռազմական գործողությունների սկսման նախերգանք, ինչը հետապնդում է երկու նպատակ՝ կամ ՀՀ իշխանությանը պարտադրել պայմանագրի ստորագրում, կամ սկսել ՀՀ դեմ ռազմական գործողություններ։

Բաղդասարյանը խոսելով այն մասին, թե ստեղծված իրավիճակում ո՞ր երկրներից կարելի է աջակցություն սպասել, ասել է․ «Ադրբեջանական ագրեսիայի զսպման մեխանիզմներն Արևմուտքում չեն, նրանց հետ հույսեր կապել չի կարելի։ Իսկ ՀՀ իշխանության տարբեր ներկայացուցիչների՝ ՆԱՏՕ, ԱՄՆ, ԵՄ այցերին ի պատասխան, Ռուսաստանից պետք է սպասել ցավալի արձագանքների։ Ռուսաստանն ունի այս տարածաշրջանում իրական ուժային լծակներ և դա կաշխատեցնի, փոխարենը՝ Արևմուտքն ունի իրական լծակներ ունենալու ցանկություն ընդամենը»։
Ըստ վերլուծաբանի՝ Փաշինյանի իշխանությունն իրականում պետք է մեր ժողովրդին պատրաստի պատերազմի, սակայն դա չի անում, որովհետև չի բացառում, որ խաղարկի 44-օրյա պատերազմի սցենարը՝ պատերազմ-զոհեր, ինչից հետո նոր՝ ստորագրում․ «Եթե մի անգամ նրա մոտ ստացվել է, ինչո՞ւ հիմա նույնը չպետք է անի. վստահ եմ՝ Փաշինյանը խաղաղության պայմանագիրը չի ստորագրի, որովհետև իրեն այդ դեպքում կասեն՝ դավաճան, բայց քանի որ մի անգամ նա տվել է Արցախի մեծ մասը և կարողացել է պահպանել իշխանությունը՝ մեղադրելով նախկիններին, ճիշտ նույնն է անելու նաև հիմա»,- նշել է Բաղդասարյանը։