«Ուղիղ իմաստով չհնչեց, բայց Էրդողանը հետևյալ միտքն արտահայտեց». Հակոբ Բադալյան

Քաղաքական մեկնաբան Հակոբ Բադալյանի գրառումը. «Պուտինի հետ հանդիպմանն Էրդողանը կարծես թե ակնարկեց նրան Թյուրքալեզու պետությունների կազմակերպության վեհաժողովին հրավիրելու մասին:

Ուղիղ իմաստով չհնչեց, բայց Էրդողանը հետևյալ միտքն արտահայտեց, թե, եթե առաջիկայում լինեք Սամարղանդում, կրկին կհանդիպենք: Իսկ Սամարղանդում առաջիկայում՝ մոտ մեկ ամիս անց, սպասվում է Թյուրքալեզու երկրների վեհաժողովը:

Հետևաբար, ենթադրում եմ, որ Էրդողանի ակնարկը հրավերի առկայության մասին էր: Սա նաև զարմանալի չէ: Պուտինն Էրդողանին էր հրավիրել Սամարղանդ՝ մոտ մեկ ամիս առաջ տեղի ունեցած Շանհայի գործակցության կազմակերպության վեհաժողովին, Էրդողանն էլ «պատասխան» հրավեր է անում: Առավել ևս նորություն չէ նաև, որ Ռուսաստանը շատ ավելի վաղ արտահայտվել է Թյուրքալեզուների կազմակերպության դիտորդ լինելու մտադրություն:

Պուտինի որոշումը, ըստ ամենայնի, կախված կլինի Թուրքիան ռուսական գազի խոշոր հաբի վերածելու Պուտինի առաջարկին Էրդողանի արձագանքից, թե որքանով այն կլինի գործնական: Իհարկե, թերևս ոչ միայն դրանից, բայց այդ առաջարկը, ըստ իս, գործնականում ունի Թուրքիան որոշակիորեն ռուսական գազի «փայատեր» դարձնելու իմաստ, իհարկե, ոչ բառի ուղիղ իմաստով: Անկարայի համար հարցն այն է լինելու, թե այդ գազից Եվրոպայի հրաժարվելու դեպքում ի՞նչ պետք է անի այն, որովհետև Ռուսաստանի առաջարկի խորքում թերևս նաև այն է, որ ստանալով «փայ», Թուրքիան նաև ստանձնելու է վաճառքի հարցեր լուծելու «պարտավորություն»:

Ֆրանսիայի նախագահ Մակրոնի վերջին ելույթի մեր ականջը շոյած շեշտադրումների խորքում նաև այդ գործընթացներն են, հաշվի առնելով և այն, որ Ֆրանսիան չափազանց զգայուն է Թուրքիայի դերակատարման որևէ ընդլայնման հեռանկարի հանդեպ»: