««Խաղաղության պայմանագիր» ստորագրելու դեպքում կկարողանա՞նք ապահովագրել Հայաստանի տարածքը»․ Արա Պողոսյան

Քաղաքագետ Արա Պողոսյանի գրառումը․ «Բաքուն հարմար պահին կգնա՞ նոր ավանտյուրայի։ Վստահ եմ, որ այո՛, կգնա։ Իսկ «խաղաղության պայմանագիր» ստորագրելու դեպքում կկարողանա՞նք ապահովագրել Հայաստանի տարածքը։ Վստահաբար կկարողանանք ապահովագրել, բայց ո՛չ թե ՀՀ տարածքը, այլև Ադրբեջանի երաշխավորված նոր ճնշումները և նոր ռազմական գործողությունների համար նոր կազուս բելլի ստեղծելը։
Իսկ գոնե Սփյուռքը կկարողանա՞ հանգիստ ապրել ու ԱՄՆ-ից, Ֆրանսիայից և այլ վայրերից գոնե մեզ ուղղություններ ցույց տա, թե ինչպես ապրենք, կամ գոնե ինչպես զոհվենք...
Արի ու տես, որ Սփյուռքի համար էլ սկսվում են դառը ժամանակներ։
Թուրքիայի արտաքին գործերի նախարար Մևլութ Չավուշօղլուն լրագրողի հարցին ի պատասխան ասել է, որ Սփյուռքի հայերը, հատկապես ԱՄՆ-ի և Ֆրանսիայի, շատ են խանգարում իրենց գործերին, և Թուրքիան իր համայնքների միջոցով պետք է հակազդի նրանց։
Շատերը կարծում եմ հիշում են թուրքական «գորշ գայլերի» կազմակերպած սպանություններն ու ահաբեկչությունները։ Թուրքը հակազդելու այլ ձև չգիտի, քան սպանելն ու ոչնչացնելը։
Հիմա էքզիստենցիալ վտանգը ո՛չ միայն Հայաստանի հայերի, այլև Սփյուռքի մեր սիրելի եղբայրների վզից է կախվել։ Ելքը միայն համատեղ գործելն ու միասնաբար հակազդելն է։ Եթե ոչ, ոչ ոք չգիտի, թե թշնամին երբ ու ում տուն կմտնի...»: