«Փաշինյանն ուղղակի հատուկ խնդրել է, որ այդ հղումը լինի 91 թվականի վրա». Լևոն Զուրաբյան

ՀԱԿ փոխնախագահ Լևոն Զուրաբյանը «Ազատության» եթերում անդրադառնալով դիտարկմանը, ըստ որի՝ իշխանությունները լավատես են, որ սահմանագծման հիմքում դնելով 1991 թվականի Ալմա-Աթայի հռչակագիրը, վերջ կդրվեն Ադրբեջանի հավակնություններին 29 հազար 800 քառակուսի կիլոմետրի նկատմամբ, ասել է. «Նախ ես չեմ հասկանում՝ ինչ կապ ունի 91 թվականի ԱՊՀ-ի ստեղծման Ալմա-Աթայի հայտարարությունն այս ամեն ինչի հետ: Եթե այդ հայտարարությունով պետք է երաշխավորվի խաղաղությունը, ուրեմն 91 թվականից պիտի երաշխավորված լիներ»: «Հայաստանը երբեք 91 թվականից սկսած երբևիցե չի ճանաչել Ադրբեջանի տարածքային ամբողջականությունը որևէ փաստաթղթով՝ անհատապես: Այսինքն՝ ոչ թե որևէ կազմակերպության անդամակցելիս, այլ որ հենց Ադրբեջանի տարածքային ամբողջականությունը ճանաչի, որովհետև Հայաստանը երբեք չի նախատեսել, որ Լեռնային Ղարաբաղի հարցը պետք է լուծվի Ադրբեջանի տարածքային ամբողջականության շրջանակներում»,- ասել է նա:

Զուրաբյանը խոսել է նաև այն մասին, թե ինչ նպատակներ է հետապնդում իշխանությունը՝ այս թեման շրջանառելով: «Փաշինյանն ուղղակի դիվանագիտական մի, այսպես ասած, խաբեությամբ ուզում է թաքցնել ճշմարտությունը և պատասխանատվությունը այդ ակտի համար, որ առաջին անգամ Հայաստանը պաշտոնապես ճանաչում է Ադրբեջանի տարածքային ամբողջականության սկզբունքը, ըստ էության, համաձայնվելով, որ Լեռնային Ղարաբաղը պետք է Ադրբեջանի մաս կազմի, թեև դրա մասին դեռ չի ասվում, սա առաջին անգամ է կատարվում: Փաշինյանը ուղղակի հատուկ խնդրել է, որ այդ հղումը լինի 91 թվականի վրա, որ այդ պատասխանատվությունից խուսափի հայ լսարանի առաջ»: