«Որոշում չկա, քննարկումներ կան»․ Միրզոյանը՝ ՀԱՊԿ-ի կողմից դիտորդներ ուղարկելու մասին

ՀՀ արտաքին գործերի նախարար Արարատ Միրզոյանն ու պաշտոնական այցով Հայաստանում գտնվող Նորվեգիայի Թագավորության ԱԳ նախարար Աննիկեն Հյութֆիլդտը հանդես են եկել մամուլի ասուլիսով: Արարատ Միրզոյանն ասել է. «Քննարվում է Հայաստան-Ադրբեջան սահմանին ԵԱՀԿ դիտորդներ գործուղելու թեման։ Ինչ վերաբերում է ՀԱՊԿ դիտորդներին՝ մենք դիմել ենք կազմակերպությանը, ՀԱՊԿ-ում որոշում է կայացվել նախնական դիտորդական կամ փաստահավաք առաքելություն ուղարկել։ Պաշտոնյաները եկել են, իրենց արձանագրումների հիման վրա զեկույց են պատրաստել, այն ներկայացված է ՀԱՊԿ անդամ բոլոր պետություններին։ Քարտուղարությունն այժմ զեկույցի հիման վրա որոշման նախագիծ է շրջանառել։ Դիտորդական առաքելության գործուղման որոշում չկա, քննարկումներ կան, պետք է խորհրդի նիստ տեղի ունենա։ Մեզ համար չափազանց կարևոր է իրավիճակի քաղաքական գնահատականը, որով հանդես կգան մեր դաշնակից պետությունները։ Մեզ նախևառաջ պետք է հասկանալ՝ որքանով է կազմակերպությունը ճանաչում այն իրավիճակը, որը կա, իսկ դա ագրեսիա է ՀՀ-ի դեմ և ներխուժում ՀՀ սուվերեն տարածք»։