«ԱՄՆ կոնգրեսականը հայտարարեց, որ Արցախը պետք է լինի Ադրբեջանի կազմում՝ ունենալով ինչ-որ ավտոնոմիա»․ Կարեն Քոչարյան

Քաղտեխնոլոգ, հանրային գործիչ Կարեն Քոչարյանը 24 TV-ին տված հարցազրույցում անդրադարձել է հարցին՝ արդյո՞ք «խաղաղության պայմանագրում» գոնե մեկ տողով չպետք է խոսվի Արցախի հարցի մասին․ «Երեկ ԱՄՆ կոնգրեսմենը՝ Դեյվիդ Փրայսը, հայտարարեց, որ Արցախը պետք է լինի Ադրբեջանի կազմում՝ ունենալով ինչ-որ ավտոնոմիա։ Արևմտյան համաձայնագրի մոդելում փաստացի ասվում է, որ այո՛, Արցախն Ադրբեջանի մաս է, բայց որոշակի բավականին ցածր կարգավիճակով»։

Նման պայմաններում այսօրվա իշխանությունների քայլերի մասին խոսելով՝ քաղտեխնոլոգը նշել է․ «Ես չգիտեմ՝ ինչ են անելու մեր իշխանությունները, ես չեմ նախանձում իրենց, որովհետև այս իրավիճակում իրենք իրենց իսկ ձեռքով են իրենց գցել»։

Իշխանության այն հավաստիացումներին, որ «խաղաղության պայմանագրում» չի շեշտվելու Արցախի կարգավիճակի հարցը, ՀՀ և ԱՀ հարցերը տարանջատվելու են, Քոչարյանը չի հավատում․ «Գիտեք, ես վաղուց արդեն չեմ հետևում, թե մարդիկ ինչ են ասում, ես հետևում եմ, թե ինչ են անում, առավել ևս իշխանությունները, որոնք չորս տարի խաբում են, մանիպուլացնում։ Այնպես որ, որևէ վստահություն չեն ներշնչում նրանց ասածները»։