«Ադրբեջանում անհանգստացած են Իրանի հայտարարությունից». Տաթևիկ Հայրապետյան

ԱԺ նախկին պատգամավոր Տաթևիկ Հայրապետյանը տեսանյութ է տարածել՝ կից գրառմամբ. «Ադրբեջանական AZ TV կայքի պատրաստած «Հայանպաստ քաղաքականություն» վերտառությամբ ռեպորտաժում անդրադառնում են Իրանից եկող հայտարարություններին, նախազգուշացումներին և անցկացվող զորավարժություններին։ Հաղորդավարը հարցադրում է բարձրացնում, թե արդյոք Իրանը վախենո՞ւմ է Ադրբեջանի հզորացումից՝ վերհիշելով, որ 2020թ. դեկտեմբերին Բաքվի «ռազմական շքերթի» ժամանակ Էրդողանը մի քառատող արտասանեց՝ մեջբերելով ադրբեջանցի բանաստեղծ Ահմեդ Ջավադին․ «Արաքսը մեզանից բաժանեցին, երկաթներով ու քարերով լցրին, ես քեզնից չէի բաժանվի, մեզ ստիպողաբար են բաժանել...»: Ըստ հաղորդավարի՝ դա ոտքի է հանել բազմաթիվ թյուրքալեզուների, որոնք ապրում են Իրանում։

Իմ կարծիքով, Ադրբեջանում ամենաշատն անհանգստանում են այն կապակցությամբ, որ Իրանը հայտարարել է, որ Հայաստանի անվտանգությունը դա Իրանի անվտանգությունն է, ինչը բարդացնում է մեր դեմ լայնամասշտաբ ագրեսիա ձեռնարկելու գործը։ Այս թանկ ժամանակահատվածն ու ժամանակավոր դադարը պետք է մաքսիմալ խելացի օգտագործել, քանի որ մեր անվտանգության թիվ մեկ պահապանը միևնույն է՝ մենք ենք»։