«Մենք երբեք չենք խուսափել Ադրբեջանի հետ բանակցելուց». Դավիթ Բաբայան

Արցախի արտաքին գործերի նախարար Դավիթ Բաբայանն «Ազատության» ֆեյսբուքյան ասուլիսի ժամանակ արձագանքելով օգտատիրոջ հարցին՝ «ինչո՞ւ Արցախը չի ցանկանում բանակցել Ադրբեջանի հետ», պատասխանել է․ «Մենք երբեք չենք խուսափել Ադրբեջանի հետ բանակցելուց, խնդիրն այն է՝ ի՞նչ ձևաչափով ենք մենք բանակցում։ Ադրբեջանն ասում է՝ մենք կբանակցենք մեր «աբորիգենների» հետ, որոնք պետք է գան և ներողություն խնդրեն մեզնից, մենք էլ տեսնենք՝ ինչ իրավունքներ, ազատություններ իրենց տանք․ սա մեզ համար անընդունելի է»։

Անդրադառնալով լուրերին, թե Արցախում տեղի ունեցած բազմահազարանոց հանրահավաքին Հայաստանից ավտոբուսներով մարդիկ են բերվել, Բաբայանը հակադարձել է․ «Որևէ մեկը ավտոբուսով մարդ չի տարել, Արցախի բնակչության կեսը եղել է հանրահավքին՝ 68 հազար մարդ. ոչ միայն եղել են Կենտրոնական հրապարակում, այլև հարակից փողոցները լեփ-լեցուն էին մարդկանցով։ Հատուկ ուզում են Արցախին անպատվել»։