ՔԿ-ին չի հաջողվում Արմեն Աշոտյանի դեմ ցուցմունք տվող գտնել․ «Հրապարակ»

«Հրապարակ» թերթը գրում է․ «Քննչական կոմիտեին մինչ այս պահը չի հաջողվում Արմեն Աշոտյանի դեմ ցուցմունք տվող գտնել, թեպետ անցած շաբաթվանից փնտրտուքների մեջ են և մոտ 100 մարդու են հարցաքննել: Ընդամենը երկու անձի ցուցմունքը կարող է «եղանակ» փոխել։ Խոսքը բժշկականի նախկին ռեկտոր 70-ամյա վաստակաշատ բժիշկ Միքայել Նարիմանյանի մասին է, ում մարդիկ գիտեն որպես կաթողիկոսի բժիշկ, և ում շաբաթ օրը ձերբակալելուց և մի քանի ժամ պահելուց հետո ազատ արձակեցին՝ 40 մլն դրամ գրավ կիրառելով, ինչպես նաև՝ արհկոմիտեի այն շրջանի նախագահ Մարթա Սիմոնյանի։ Մեզ ասացին, որ երկուսն էլ Աշոտյանի դեմ ցուցմունք չեն տվել, գոնե այնպիսի ցուցմունք, որ կարողանան Աշոտյանին ձերբակալել, և քննչականն այս ուղղությամբ այլ միջոցներ է փորձում ձեռնարկել։

Հիշեցնենք․ քրեական գործի «հիմքը» 2015 թվականի դեպքերն են, ԵՊԲՀ-ն Իշխան Սաղաթելյանին պատկանող՝ Սևանի ափին գտնվող հանգստյան տանը գույքը ձեռք է բերել կադաստրային արժեքից թանկ գնով, և դա դատախազությունը ներկայացնում է որպես հափշտակություն։ Հարցաքննվել է նաև Իշխան Սաղաթելյանի հայրը, ով խնդրո առարկա գույքի սեփականատերն է»։

Մանրամասները՝ թերթի այսօրվա համարում։