«Ռուսական զորքի դուրս գալու Ադրբեջանի պահանջը պետք է լեգիտիմ լինի». Փաշինյան

«Տեսականորեն 2025 թվականից հետո կարող է պահանջված չլինել խաղաղապահների ներկայությունը, եթե ԼՂ հայության իրավունքների ու անվտանգության ապահովման հետ կապված բոլոր երաշխիքները ստեղծված լինեն»,-Հ1-ի տաղավարում ասաց վարչապետ Նիկոլ Փաշինյանը՝ Ադրբեջանի նախագահի՝ նոյեմբերի 8-ի ելույթը որակելով Սոչիի հայտարարության խախտում։

«Ես ուզում եմ ասել, որ ՌԴ խաղաղապահները, առանց նման երաշխիքների հստակ ձևակերպման, չեն կարող դուրս գալ, ուղղակի չեն կարող: ՌԴ խաղաղապահ զորախումբը ԼՂ շփման գծի երկայնքով ու Լաչինի միջանցքի երկայնքով տեղակայվել է ՌԴ դաշնային խորհրդի ընդունած որոշման հիման վրա ու այդ որոշումը, եթե կարդանք, կտեսնենք՝ գրված է, որ խաղաղապահները տեղակայվում են ԼՂ քաղաքացիական բնակչության զանգվածային սպանությունները կանխելու ու թույլ չտալու համար», – ասաց վարչապետը՝ շեշտելով․ «Ռուսական զորքի դուրս գալու Ադրբեջանի պահանջը պետք է լեգիտիմ լինի։ Եթե Ռուսաստանն ուզենա դուրս գալ ԼՂ-ից, ապա պետք է դիմի ՄԱԿ-ի անվտանգության խորհուրդ: Եթե Ռուսաստանը ցանկություն, կամ կարողություն չունի դա ապահովելու, պետք է դիմի ՄԱԿ-ի անվտանգային խորհրդին, ասի՝ «տեսեք, ես ֆիքսել եմ սպառնալիքը, բայց չեմ կարողանում կամ չեմ ուզում հասցեագրել, հետևաբար դիմում եմ, որ այս հարցը լուծեք, ես գնում եմ, թող ուրիշ մարդիկ գան»»։