«2023 թվականի հարկային եկամուտները կավելանան». Տիգրան Խաչատրյան

«2023 թվականի բյուջետային ծրագրերի հիմնական առանցքը շարունակելու է լինել անվտանգային միջավայրի, տնտեսական հզորացման, մարդկային կապիտալի զարգացման և մեր քաղաքացիների սոցիալական պաշտպանվածության ամրապնդումը կառավարության ծրագրով սահմանված թիրախներին համահունչ»,- ԱԺ քննարկմանը ներկայացնելով 2023 թվականի պետական բյուջեի նախագիծը, ասաց ֆինանսների նախարար Տիգրան Խաչատրյանը:

«2023 թվականի պետական բյուջեի հիմքում ընկած հարկաբյուջետային քաղաքականությունն ուղղված է այդ նպատակին։ Հարկային եկամուտների ավելացումը, ծախսային ծրագրերի նպատակայնության բարձրացումը, բյուջեի ֆինանսավորման նպատակով նոր փոխառու միջոցների ներգրավման և առկա պարտքի կառավարման արդյունավետության բարձրացումը, հարկաբյուջետային քաղաքականության այն հիմնական ուղղություններն են, որոնք պետք է միտված լինեն մասնավոր հատվածի արագ զարգացմանը և ձևավորեն դրան նպաստող մակրոտնտեսական միջավայր»,- ասաց Ֆինանսների նախարարը: