«Եթե ՀՀ իշխանությունները հույսը դնում են բացառապես ռուս խաղաղապահների վրա, չպետք է Զելենսկու ելույթի ժամանակ հոտնկայս ծափահարեն»․ Արթուր Խաչատրյան

Այսօր խորհրդարանական ճեպազրույցի ընթացքում «Հայաստան» խմբակցության պատգամավոր Արթուր Խաչատրյանը, անդրադառնալով «բնապահպանական» խնդիրների պատրվակով Բերձորի միջանցքը փակելու ադրբեջանցիների փորձերին և ՀՀ իշխանությունների քայլերին, նկատել է․ «Գիտեք, եթե դուք Երևանից գնաք դեպի Ստեփանակերտ, ճանապարհին կտեսնեք նաև ադրբեջանական պետհամարանիշերով մեքենաներ․ պետք է այնպես անել, որ ադրբեջանցիների մուտքը դեպի Արցախ սահմանափակվի։ Եթե ՀՀ իշխանությունները հույսը դնում են բացառապես ռուս խաղաղապահների վրա, ապա պետք է հասկանան իրավիճակը, որը ստեղծվել է։ Որոշ իշխանական պատգամավորներ Զելենսկու ելույթի ժամանակ չպետք է հոտնկայս ծափահարեն, ինչպես գրվել է մամուլում: Եթե ՀԱՊԿ-ը, որի անվտանգային համակարգի անդամ ենք մենք, առաջարկում է ռազմատեխնիկական աջակցություն, չպետք է կամակոր երեխայի նման ոտքերը խփել գետնին, ասել՝ չէ, մենք քաղաքական հայտարարություն ենք ուզում»։