«Փաշինյանի ելույթը նշանակում էր՝ «Էրդողան ջան, քեզ հետ խնդիր չունեմ, Ալիևին ասա՝ ինձ շատ չնեղի»․ Շարմազանով

«Հայաստանի իշխանությունը Ցեղասպանության գլոբալ ֆորում էր կազմակերպել թուրքերին սիրաշահելու համար, ելույթի ժամանակ Նիկոլ Փաշինյանը ոչ մի խոսք չասաց Թուրքիայի ժխտողականության, Հայոց ցեղասպանության և միլիոնուկես հայերի սպանության մասին: Փաշինյանի ելույթը մեկ բան էր նշանակում. «Էրդողան ջան, իմ մեծ ախպերն ես, քեզ հետ խնդիր չունեմ, Ալիևին ասա՝ ինձ շատ չնեղի, ինչ ասես՝ կանեմ, պատրաստ եմ գամ, պայմանավորվենք»,- 24TV-ի եթերում նման կարծիք է հայտնել ՀՀԿ ԳՄ անդամ Էդուարդ Շարմազանովը:

«Բոլոր նրանք, ովքեր ուրախանում են, որ ռուսները կգնան տարածաշրջանից, պետք է հասկանան, որ եթե ռուսները գնան, թուրքերն են գալու, թող չայը դնեն ու սպասեն: Ընդամենը երկու տարի առաջ են թուրքական բայրաքթարները մեր երիտասարդներին սպանել, հիմա էլ Թուրքիան հովանավորում է Ադրբեջանին, իսկ ՀՀ իշխանությունը փոխանակ իր շահը պաշտպանի, ամեն ինչ արեց հայ-ռուսական հարաբերությունները փչացնելու համար: Պետք է հասկանան, որ խաղաղապահների շնորհիվ է, որ Արցախում հայերը մնացել են, եթե նրանք գնան, թուրքերն են գալու ու ՀՀ-ն, որպես ինքնուրույն գործոն, վերանալու է»,- խոսելով Արցախում ռուս խաղաղապահների դերի մասին՝ ընդգծել է Շարմազանովը։