«Համոզված եմ՝ ՌԴ-ն մեզ ուզում է ներքաշել պատերազմի մեջ Ադրբեջանի հետ»․ Վիգեն Խաչատրյան

«Ես համոզված եմ, որ սա պատասխան է Հայաստանի այն դիրքորոշմանը, որ մենք Ղարաբաղի հարցում կիսում ենք Ռուսաստանի տեսակետը: Ադրբեջանի պատվիրակությունը մի քանի անգամ քվեարկում է, որ Ռուսաստանն ագրեսոր պետություն է, պատասխանը մենք ենք ստանում, ոչ թե Ադրբեջանը: Բոլորիս աչքի առաջ ռուս խաղաղապահները մինչև ատամները զինված նայում էին՝ ոնց են մի քանի բաշիբոզուկ վրաններ տեղադրում: Դուք տեսա՞ք՝ որևէ մի խաղաղապահ մոտեցա՞վ, ասեր՝ ճանապարհը մի փակեք: Ես ավելի քան համոզված եմ, որ ՌԴ-ն մեզ ուզում է ներքաշել պատերազմի մեջ Ադրբեջանի հետ, այս բոլորը դրան է ուղղված»,- այս մասին ադրբեջանցիների կողմից Լաչինի միջանցքը փակելու առնչությամբ հրավիրված ԱԺ արտահերթ նիստի ընթացքում հայտարարել է ՔՊ-ական Վիգեն Խաչատրյանը:

«ՌԴ-ն ցանկանում է հրաժարվել Ղարաբաղից և փոխարենը՝ Հայաստան ստանալ Ադրբեջանից․ սա մենք պետք է հասկանանք, և ուղղակի պետք է մտնենք խոսակցության մեջ Ադրբեջանի հետ և միջազգային գործընկերների հետ»,- ավելացրել է իշխանական պատգամավորը։

Անդրադառնալով ընդդիմության կողմից կառավարության դիմաց կազմակերպվելիք ցույցին՝ Խաչատրյանն ասել է․ «Էս մեր ռևանշիստներն ի՞նչ են ուզում, թող գնան ՌԴ դեսպանատան դիմաց հանրահավաք անեն, ինչի՞ են գնում Կառավարության դիմաց։ Երազում են այդ պատերազմի մասին, միակ ճանապարհն է, որ մի հատ էլ պարտվենք ու իրենք իշխանության գան արդեն Ռուսաստանի նահանգում։ Չի՛ լինելու դա»։