«Հայաստանն ուժ ունի՞՝ գնա, միջանցքն ազատի, Բաքվին երրորդ երկրները պետք է զսպեն». ՔՊ-ական պատգամավոր

Լաչինում տեղի ունեցածը 1990 թվականի «Операция кольцо»-ի շարունակությունն է, երբ հայկական համայնքները հայաթափվեցին, նույնը հիմա են ուզում անել: Նոյեմբերի 9-ի եռակողմ հայտարարությամբ ռուս խաղաղապահները պետք է ապահովեն Արցախի անվտանգությունը, Հայաստանը Արցախում այլևս զինված ուժեր չունի, եթե ռուսները ուզենան, ադրբեջանցի վայրի խուժաններին այնտեղից կքշեն: Այս մասին 24TV-ի հաղորդման ժամանակ ասաց ԱԺ «Քաղաքացիական պայմանագիր» խմբակցության պատգամավոր, Պաշտպանության նախկին փոխնախարար, գեներալ-լեյտենանտ Գագիկ Մելքոնյանը՝ անդրադառնալով երեք օր շարունակ Լաչինի միջանցքը ադրբեջանցիների կողմից փակ պահելու հանգամանքին:
Պատգամավորի խոսքով, ադրբեջանցիների ախորժակը մեծ է, նրանք ցանկանում են Լաչինում պատերազմ հրահրել, որպեսզի Սյունիքով միջանցք ստանան: Դիտարկմանը, թե այս դեպքում Հայաստանի իշխանությունը ի՞նչ պետք է անի, պատգամավորը նշեց, որ իրավիճակի լուծումը Հայաստանի ձեռքը չէ, խոշոր պետություններից յուրաքանչյուրն իր ներկայությունն է ուզում այստեղ ապահովել. «Հայաստանն ուժ ունի՞ գնա միջանցքը ազատի, Ադրբեջանի մեջքին Թուրքիան է կանգնած, մի բան լինի, իր զորքը կմտցնի, ի՞նչ ենք անելու, երրորդ երկրները պիտի զսպեն Ադրբեջանին:
Այս իրավիճակում ՀՀ-ում գտնվող Արցախի նախկին ղեկավարությունը պետք է գնա և կանգնի արցախցիների կողքը, երբ իրենք գնան, ես էլ նրանց կմիանամ»,-ավելացրեց Մելքոնյանը:
Մանրամասները՝ տեսանյութում։