Արցախի Մեծ Շենը՝ մայրաքաղաք Ստեփանակերտից կտրված. գյուղապետը՝ իրավիճակի մասին

Ստեփանակերտի հետ կապի բացակայության երկարատև լինելու դեպքում կենսական խնդիրների առջև կարող ենք կանգնել․ Մեծ շենի համայնքապետ

Ադրբեջանի կողմից Ստեփանակերտ-Գորիս միջպետական մայրուղին փակելու պատճառով արդեն հինգերորդ օրն է Բերդաձորի ենթաշրջանի Մեծ շեն համայնքի կապը նույնպես կտրված է մայրաքաղաք Ստեփանակերտի հետ։

«Արցախպրես»-ի թղթակցի հետ զրույցում Մեծ շենի համայնքապետ Դավիթ Դավթյանը հավաստիացրել է՝ այս պահի դրությամբ ոչնչի պակաս չունեն գյուղի բնակիչները։
«Բնականաբար անհանգստացնող է մայրաքաղաքի հետ կապի բացակայությունը, ինչը երկարատև լինելու դեպքում կենսական խնդիրների առջև կարող է կանգնեցնել մեր բնակիչներին»,- նշել է համայնաքապետը։ Դ. Դավթյանն իրազեկել է, որ ճանապարհին մնացած անձանց մի մասը տեղավորվել է Մեծ շենում։ «Որոշ մեր հայրենակիցների նաև մեր տանն ենք տեղավորել»,- ասել է համայնքապետը՝ հավելելով, որ այս օրերին գյուղի դպրոցում շարունակվում է դասապրոցեսը՝ դասասենյակների ջեռուցումն իրականացնելով էլեկտրական տաքացուցիչներով։