«ՄԱԿ ԱԽ-ն կձևացնի, որ խիստ մտահոգված է, Ադրբեջանն էլ իր հերթին կձևացնի, որ հետևում է այդ հորդորին»․ Արմեն Բաղդասարյան

Քաղաքական վերլուծաբան Արմեն Բաղդասարյանը 168 TV-ի եթերում խոսելով ՄԱԿ-ի անվտանգության խորհրդի նիստից սպասելիքների մասին՝ ասել է․ «Արցախի և հայ-ադրբեջանական հակամարտության խնդրում ՄԱԿ-ի ԱԽ անդամների շահերը ոչ միայն չեն համընկնում, այլև հակադրվում են: ՄԱԿ ԱԽ-ն լուրջ որոշումներ ընդունում է միայն կոնսենսուսով. այդպիսի կոնսենսուսը բացառված է, դրա համար պետք չէ սպասել այնպիսի կոշտ հայտարարություն, որից անմիջապես հետո Ադրբեջանը կբացի ճանապարհը: Պետք է սպասել ընդամենը հորդոր, որը պարտադրանքի ուժ չի ունենա, այսինքն՝ ՄԱԿ ԱԽ-ն ընդամենը կձևացնի, որ խիստ մտահոգված է այս իրավիճակով, Ադրբեջանն էլ իր հերթին կձևացնի, որ՝ այո, հետևում է այդ հորդորին, և ժամանակ առ ժամանակ գուցե մարդասիրական նկատառումներով ինչ-որ մեքենաներ բաց կթողնի: Ավելին պետք չէ ակնկալել»:
Անդրադառնալով Արցախի շրջափակման խնդրի լուծման հարցում ՀՀ իշխանությունների դերակատարությանը՝ վերլուծաբանը նկատել է․ «Ստացվել է այնպես, որ բոլորը լավ կամ վատ իրենց ֆունկցիան կատարում են, բայց իշխանությունն իր բաժին ֆունկցիան չի կատարում, որ պետք է աներ պետական մակարդակով, դա անելու փոխարեն՝ իշխանությունն էլ է անում այն, ինչ հասարակությունը պետք է անի, օրինակ՝ թվիթերյան գրառումներ, ֆլեշմոբեր և այլն։ Պետք է կազմակերպել հարյուրհազարանոց հանրահավաք, որը չի անտեսվի աշխարհի կողմից»: