«ՌԴ հայտարարությունը իրականությունը չէր արտացոլում». Արտակ Բեգլարյան

Այսօր՝ դեկտեմբերի 21-ին, ՄԱԿ-ի հայաստանյան գրասենյակի դիմաց օրեր շարունակ նստացույց իրականացնող Արցախի պետնախարարի խորհրդական Արտակ Բեգլարյանը լրագրողների հետ զրույցում անդրադարձել է ՄԱԿ-ի ԱԽ նիստում ՌԴ ներկայացուցչի հետևյալ հայտարարությանը, որ Լաչինի միջանցքի արգելափակման պատճառը կողմերի տարաձայնություններն են կապված տարածաշրջանի հանքավայրերի շահագործման հետ և որ համաձայնեցվում են ադրբեջանցի բնապահպանների՝ հանքավայրեր այցելության պայմանները․ «ՄԱԿ-ի ԱԽ նիստում ՌԴ ներկայացուցչի հայտարարությունը միանշանակ չէր արտացոլում Լաչինի շուրջ ստեղծված իրական իրավիճակը: Մեղմ ասած՝ նախընտրելի հայտարարություն չէր: Այսինքն՝ բնականաբար, հաշվի առնելով իմ կարգավիճակը, որոշակի գնահատականների հարցում զսպվածություն եմ ցուցաբերում, բայց այն, որ ՌԴ հայտարարությունը իրականությունը չէր արտացոլում, սա ինձ համար միանշանակ է: Պատճառների մասին կարող եմ ուղղակի ենթադրել. հաշվի են առել տարբեր շահեր, փոխկապակցվածություններ, հնարավոր ռիսկեր, բայց սա իրենք պետք է մեկնաբանեն, թե ինչու են այդպիսի հայտարարություններ արել»,- նշել է Բեգլարյանը: