«Եթե Ռուսաստանն Ադրբեջանի վրա ունենար այն ազդեցությունը, որն ուներ 90-ականներին, կարող էր կես զանգով բացել սահմանը»․ Արգիշտի Կիվիրյան

Վերլուծաբան Արգիշտի Կիվիրյանը 168TV-ի եթերում խոսելով Հայաստանը Արցախին կապող ճանապարհի փակման խնդրի լուծման հարցում Ռուսաստանի կողմից գործնական քայլեր չձեռնարկելու մասին՝ ասել է․ «Ռուսաստանը վտանգ է տեսնում այս իշխանությունների հետ ինչ-ինչ օպերացիաներ նախաձեռնելու մեջ․ չէի ցանկանա շատ մանրամասնել, ուղղակի հիշում եք, որ ռուսական տարբեր շրջանակներից հայտնվեց այն կարծիքը, որ բավական էր պատերազմի ժամանակ Հայաստանի հետ Ռուսաստանի ղեկավարներն ինչ-որ բան խոսեին, 5 րոպե հետո դա Բաքվում իմանում էին: Այսինքն՝ դա ուղղակի մեղադրանք էր, որ ի դեմս ՀՀ իշխանությունների՝ ՌԴ-ն տեսնում է ոչ թե Հայաստանը սպասարկող իշխանություն, այլ իր համար անհասկանալի շահեր սպասարկող մի իշխանություն, որն ընդունակ է, ռուսերեն լեզվով ասած, իրեն մշտապես подставка անել: Արդյո՞ք ՀՀ իշխանություններն այն իշխանություններն են, որ եթե իրենք ինչ-որ օպերացիայի մասին տեղեկանան, 5 րոպե հետո, ասենք՝ Բրիտանիայի դեսպանատուն համապատասխան զեկուցագիր չեն գրի»:

«Ռուսաստանի՝ Արցախում և Հայաստանում ունեցած ռազմական ներկայությունը շատ չնչին է, ինքն անկարող է որևէ լուրջ դիմադրություն կազմակերպել: Որպեսզի Ռուսաստանը կարողանա Ադրբեջանին առնվազն սպառնալ, ռուս-ադրբեջանական սահմանագծում պետք է կուտակված լինի առնվազն 100-հազարանոց հարվածային կորպուս: Շատերի մոտ այն հեքիաթային վարկածներն են, որ Պուտինը կարող է զանգել Ալիևին՝ մուննաթ գալ, հանդիպումների ժամանակ կարող է չափալախել, եթե չի անում, ուրեմն՝ չի ուզում հայերին օգնած լինի: Սակայն հանուն ինչի՞ ներկայիս Ադրբեջանը պետք է կատարի այս կամ այն պետության կամքը: Եթե Ռուսաստանն Ադրբեջանի վրա ունենար այն ազդեցությունը, որն ուներ 90-ականներին, կարող էր կես զանգով բացել սահմանը, բայց ներկայիս Ադրբեջանը 90-ականների Ադրբեջանը չէ։ Ցանկացած դեպքում, եթե ճանապարհը բացվի, բացելու է Ռուսաստանը»,- շեշտել է Կիվիրյանը։