«Հայաստանի ժողովուրդը 3 տարի նման ծայրահեղ վիճակում է եղել, կոփվեցինք ավելի շատ»․ ՔՊ-ական

ՔՊ խմբակցության պատգամավոր Գուրգեն Արսենյանը «Առավոտ»-ի հետ զրույցում, խոսելով Արցախի շրջափակման մասին, ասել է․ «Հայաստանի ժողովուրդը 3 տարի այդ ծայրահեղ վիճակում է եղել, ոչ մի բան չեղավ իր հետ առանձնապես։ Լույս չենք ունեցել, գազ չենք ունեցել, տաք ջուր չենք ունեցել․ կոփվեցինք ավելի շատ ինձ թվում է: Իսկ պանիկան գիտե՞ք ինչ է՝ ես ևս մեկ անգամ հնչեցնեմ իմ թեզը՝ Արցախի խնդիրը երբեք այլևս չի դառնալու Հայաստանում իշխանություն որոշելու հարց․ չի՛ լինելու: ՀՀ-ում իշխանությունը որոշվելու է ընտրություններով ու իշխանություն ձևավորելու է ժողովուրդը: Մի անգամ «խերվել» ենք արդեն, գիտենք դա ոնց ու ինչի համար է արվում»:

Լրագրողի դիտարկմանը, որ իրենք իրենց օրակարգերով շեղում են հանրությանը իրական խնդիրներից, Արսենյանը արձագանքել է․ «Արգենտինային, օրինակի համար, շնորհավորելով՝ հանրությունը խիստ շեղվե՞ց իր օրակարգից ու ընկա՞վ հոգեխանգարմունքի մեջ»։
Հարցին՝ «ի՞նչ գործուն քայլեր է անում իշխանությունը Արցախը շրջափակումից դուրս բերելու համար», պատգամավորը պատասխանել է․ «Արցախի համար ՀՀ իշխանության կողմից արվում է այն ամեն ինչը, ինչը որ մենք հնարավոր ենք համարում անել: Անհնար բան չի արվում, արվում է այն, ինչի գործիքակազմը կա: Մենք մեր գործունեությամբ առաջնորդվում ենք երկու կարևոր բանով, առաջինը՝ մի վնասիր և երկրորդը՝ արա այն, ինչ կարող ես անել ու քիչ խոսա դրա մասին»։