«Արցախը շրջափակված չէ 24 օր, Արցախը 24 օր է՝ հանձնված է Ադրբեջանին»․ Էդգար Ղազարյան

«Առաջին օրերին, երբ փակվեց Արցախը Հայաստանին կապող միակ ճանապարհը, ինձ էլ էր թվում, որ դա ադրբեջանցիների կողմից Արցախի շրջափակում է, բայց հիմա՝ մեկ ամիս անց, հաշվի առնելով ՀՀ-ից ու ԱՀ-ից հնչող հայտարարությունները, իմ եզրահանգումն ու ձևակերպումը սկզբունքորեն փոխվել է. Արցախը շրջափակված չէ 24 օր, Արցախը 24 օր է՝ հանձնված է Ադրբեջանին»,- 168 TV-ի եթերում նման դիտարկում է արել հասարակական-քաղաքական գործիչ Էդգար Ղազարյանը:
Ըստ նրա՝ Ադրբեջանը ցանկանում է Արցախն առանց հայերի ու ռուսների, և հիմա իրականացվում է երկու մեծ ծրագիր․ «Առաջինը՝ Արցախի հայաթափումն է․ հումանիտար աղետը ստեղծվել է՝ նոր քաղաքական իրավիճակի հանգելու նպատակով, ուստի Ադրբեջանը ցանկացած պահի կբացի Ստեփանակերտից դեպի Գորիս ճանապարհը՝ մեկ ուղղությամբ, որպեսզի Արցախը հայաթափվի։ Երկրորդ ծրագիրը ռուս խաղաղապահներին այնտեղից հանելուն է վերաբերում. այդ գործն Ադրբեջանը հանձնարարել է ՀՀ իշխանություններին, և պատահական չէ, որ նույնիսկ ամանորյա ուղերձում Փաշինյանը հայտարարեց՝ մեր դաշնակիցները մեզ թողեցին միայնակ»,- նշել է Ղազարյանը։

Ադրբեջանը 2022թ. դեկտեմբերի 12-ից փակ է պահում Լաչինի միջանցքը՝ շրջափակման մեջ պահելով Արցախի ավելի քան 120 հազար բնակչությանը: