«Եթե ոչ այժմ, ապա մի շաբաթից Մոսկվայի ակտիվացմանն ականատես կլինենք»․ Թոմաս դը Վաալ

«Քարնեգի» հիմնադրամի վերլուծաբան, Ղարաբաղյան հակամարտության փորձագետ Թոմաս դը Վաալը «Ազատության» եթերում իր տեսակետն է հայտնել Արցախի շրջափակման հետ կապված․ «Վախենամ, որ 2023 թվականը լինի լարված, ծանր։ Ես հույս ունեմ, որ նոր հակամարտություն չի լինի, բայց, իհարկե, դրա նշաններն արդեն տեղում են։ Կան լուրջ մտավախություններ, որ Ղարաբաղի հայերի ճակատագիրը և Զանգեզուրի միջանցքի հարցը ավելի շուտ որոշվելու են գետնի վրա և ոչ թե բանակցություններով»։

Վաալի կարծիքով՝ Ալիևը հետաքրքրված չէ նոր լայնամասշտաբ հակամարտությամբ․ «Ավելի շուտ նա փորձում է հասնել նրան, որ եթե այն, ինչ չստացվի բանակցություններով, փորձի այսպես ճնշել հայկական կողմին»։
Վերլուծաբանի պնդմամբ, եթե ոչ այժմ, ապա մի շաբաթից Մոսկվայի ակտիվացմանն ականատես կլինենք, որովհետև այն, ինչ տեղի է ունենում, հարված է տարածաշրջանում Մոսկվայի հեղինակությանը։ Իսկ թե ինչո՞ւ մինչ այժմ Մոսկվան չի միջամտել ստեղծված իրավիճակին՝ Վաալը նկատել է․ «Կա, այսպես ասած, ավելի ընդհանրական պատճառ, որ Ռուսաստանի բոլոր ռեսուրսներն ուղղվել են Ուկրաինային։ Իհարկե, Ղարաբաղում մնացել է խաղաղապահ առաքելությունը, բայց այն այլևս այնքան ուժեղ ու պրոֆեսիոնալ չէ, ինչպես, ասենք, մեկ տարի առաջ։ Պատճառներից է նաև, որ Մոսկվան երկար տարիներ փորձում է լավ հարաբերություններ պահպանել թե՛ Երևանի և թե՛ Բաքվի հետ»,- նշել է փորձագետը։