«Հույս չունենք, որ մոտ ապագայում այդ բոլոր խնդիրները լուծվելու են»․ Հայկ Սարգսյանը՝ անհետ կորածների հարցի մասին

Այսօր ԱԺ պաշտպանության և անվտանգության հարցերի հանձնաժողովի նիստին ընդդիմադիր պատգամավոր Գեղամ Նազարյանի ներկայացրած «ՀՀ պաշտպանության համար զոհված զինծառայողների ընտանիքի անդամների երաշխիքների մասին» օրենքի նախագծի քննարկման ընթացքում ՔՊ-ական Հայկ Սարգսյանն իր ելույթում անդրադարձավ ընդդիմադիրների այն հայտարարություններին, որ չի կարելի տոնախմբություն անել, եթե չհայտնաբերված աճյուններ ունենք․ «Առաջին Արցախյան պատերազմից հետո նույնպես ունեցել ենք անհետ կորած զինծառայողներ, որոնց աճյունները մինչ օրս չեն հայտնաբերվել, բայց վերջին 30 տարիների ընթացքում մենք մի շարք պետական տոներ ենք տոնել, այդ թվում՝ սեպտեմբերի 21, Նոր տարվա միջոցառումներ․ համոզված եմ՝ ձեր խմբակցության ներկայացուցիչների մեծ մասը, եթե ոչ բոլորը, մասնակցել են դրանց։ Այսինքն՝ խնդրում եմ, մի տարանջատեք ժամանակները, պատերազմում զոհվածի աճյունը նույն արժեքն ունի՝ անկախ նրանից դա տեղի է ունեցել ձեր կառավարման ընթացքում, Նիկոլ Փաշինյանի, թե՞ Լևոն Տեր-Պետրոսյանի կառավարման ընթացքում։ Ի՞նչ է նշանակում սա․ խնդրում եմ՝ այս հարցին մի անդրադաձեք, դա բոլոր ժամանակներում, ցավոք սրտի, եղել է, ու հույս չունենք, որ մոտ ապագայում այդ բոլոր խնդիրները լուծվելու են»,- նշեց պատգամավորը։