«Փաշինյանը ստրատեգիապես մտածող ղեկավար չէ». Լևոն Զուրաբյան

«Հայ ազգային կոնգրես» կուսակցության փոխնախագահ Լևոն Զուրաբյանը ՍիվիլՆեթի եթերում խոսելով ՀՀ վարչապետ Նիկոլ Փաշինյանի վարած քաղաքականությունից՝ կարծիք է հայտնել, որ Փաշինյանը ստրատեգիապես մտածող ղեկավար չէ․ «Նա չունի ստրատեգիա, և դա է պրոբլեմը․ նա անում է այն, ինչ այդ պահին իր կարծիքով պետք է առաջացնի ֆեյսբուքյան ամենամեծ հավանությունը։ Ինքը «Հայ ազգային կոնգրեսում» էլ էր այդ հատկությունները ցույց տալիս քննարկումների ժամանակ»,- նշել է Զուրաբյանը։
Անդրադառնալով Փաշինյանի հայտարարությանը, ըստ որի՝ ՀԱՊԿ զորավարժություններն այս իրավիճակում Հայաստանում անցկացնելը նպատակահարմար չէ, Զուրաբյանը զարմանք է հայտնել․ «Շուրջբոլորդ ստրատեգներ են․ Իրանը, Ադրբեջանն ու Թուրքիան զորավարժություններ են իրականացնում, բոլորը իրենց ռազմական մեսիջները ասում են, իսկ Նիկոլ Փաշինյանը որոշում է խաղաղության մեսիջով զբաղվել այս պահին։ Այդ խաղաղության նպատակով նա չի ուժեղացնում մեր ռազմական ուժերը, մեր դիրքերը չի ամրապնդում»,- ընդգծել է նա։