«Նախագիծն արժանի չէ քննարկման․ Լաչինի միջանցքի փակման համար մեղադրում եք ՀՀ կառավարությանը»․ Մարիա Կարապետյանը՝ ընդդիմությանը

Այսօր ԱԺ արտաքին հարաբերությունների հանձնաժողովի նիստում քննարկվում է Լաչինի միջանցքում ստեղծված իրավիճակի հետ կապված հայտարարություն ընդունելու ընդդիմության նախաձեռնությունը։ Հայտարարության տեքստը ներկայացրեց «Հայաստան» խմբակցության պատգամավոր Անդրանիկ Թևանյանը. «Հայաստանը պետք է իրականացնի իր հանձնառությունն Արցախի անվտանգության ապահովման, Արցախի ժողովրդի ինքնորոշման իրավունքի իրացման և անջատում հանուն փրկության սկզբունքի կյանքի կոչման համար։ Եթե Հայաստանը չի իրականացնում իր այս ֆունկցիաները, նշանակում է, որ Արցախի մեր հայրենակիցները վտանգվում են ոչ միայն ադրբեջանական գործողությունների արդյունքում, այլ նաև Հայաստանի դիրքորոշման արդյունքում»։
ՔՊ-ական պատգամավոր Մարիա Կարապետյանն առաջարկեց իր գործընկերներին դեմ քվեարկել նախաձեռնությանը․ «Այն կետից, երբ դուք ձեր ելույթի մեջ սկսեցիք մեղադրել ՀՀ կառավարությանը և ուրեմն՝ ՀՀ-ին՝ Լաչինի միջանցքի փակման համար, չեմ համարում, որ դա օգտակար գործունեություն է ՀՀ-ի և միջանցքի բացման համար և ուրեմն արժանի չէ քննարկման»,- ասաց նա: