«Եղել ենք առաջնագծում, շատ բան ենք տեսել, դրա համար էլ քչախոս ենք». Գեղամ Մանուկյան

Այսօր ԱԺ-ում իր ելույթի ընթացքում «Հայաստան» խմբակցության պատգամավոր Գեղամ Մանուկյանն անդրադարձել է ՔՊ-ական Անդրանիկ Քոչարյանի հայտարարությանը. «Աչքովս ընկավ Անդրանիկ Քոչարյանի՝ օրերս արված հայտարարությունը, թե՝ «դիրքերը, որ փոխվել են, նաև տվել ենք հնարավորություն, որ ընդդիմադիր գործընկերները հնարավորություն ունենան՝ տեսնելու և առնչվելու, բայց տեսնելուց հետո իրենք շատ սակավախոս են»։ Այո՛, եղել ենք առաջնագծում, Տավուշից մինչև Կապան, Ներքին Հանդ, շատ բան ենք տեսել, դրա համար էլ քչախոս ենք. աչքերում կրակով զինվորների ենք տեսել, սեփական դիրքը կառուցող ու հպարտացող հրամանատարի ենք տեսել, տեսել ենք հիվանդություններով դժվար քայլող, բայց ազատամարտիկի ոգին պահող կամավորների, տեսել ենք, հպարտացել ենք, բայց տեսել ենք նաև շատ բան, որի մասին չենք ցանկացել բարձրաձայնել։ Երբ քչախոս ենք, քչախոս ենք հանրության առաջ, որ թշնամին ինչ-որ բան չանի, ներսում Պաշտպանության նախարարին հատիկ-հատիկ գրած ենք ուղարկելու այն ամեը, ինչ տեսել ենք»,- ասել է Մանուկյանը: