«Իշխանությունն է պատասխանատուն, բայց դա չի նշանակում, որ պետք է ամեն ինչ փաթաթենք մեկ մարդու վզին». ՔՊ-ական

«Ողբերգական դեպք է տեղի ունեցել։ Քաղաքական և քրեաիրավական պատասխանատվության մասին կխոսենք, երբ դեպքի մանրամասներն ամբողջությամբ պարզվեն»,- այս մասին այսօր խոհրդարանական ճեպազրույցների ընթացքում հայտարարել է ԱԺ ՔՊ խմբակցության պատգամավոր Արթուր Հովհաննիսյանը՝ անդրադառնալով հունվարի 19-ին Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասում բռնկված հրդեհի հետևանքով 15 զինծառայողի զոհվելու դեպքին:

«Պաշտպանության նախարարը, իշխանությունն է քաղաքական պատասխանատուն երկրում տեղի ունեցած յուրաքանչյուր իրավիճակի համար, բայց դա չի նշանակում, որ միանգամից պետք է փորձենք քավության նոխազների գտնել և փորձենք ամեն ինչ փաթաթել մեկ մարդու վզին»,- ավելացրել է Հովհաննիսյանը։