«Հայ ժողովուրդը պետք է որոշի՝ միանո՞ւմ է հանուն Արցախի դիմադրությանը». Թևան Պողոսյան

Քաղաքագետ Թևան Պողոսյանը 24TV-ի եթերում խոսելով Ադրբեջանի կողմից Արցախն աշխարհին կապող միակ մայրուղու փակման մասին՝ պնդել է, որ պետք չէ հույս ունենալ, թե Ալիևը կբացի միջանցքը. «Ադրբեջանի համար պատերազմն ավարտված չէ, Ալիևն ասում է՝ ես զինադադար եմ վերցրել, իսկ մենք չգիտեմ՝ ինչերի մեջ ենք գտնվում, սրա մեջ է խնդիրը՝ պետք է պատրաստվել այդ ամենին, իսկ դա չի արվում: Պատերազմ բառից խուսափում ենք, ձևեր ենք թափում՝ պատերազմի մեջ ապրելով»,- ընդգծել է նա:

Պողոսյանի խոսքով՝ Արցախը կոչով դիմել է համայն հայությանը, որ օգնեն իրենց, հայ ժողովուրդը պետք է որոշի՝ միանո՞ւմ է այդ դիմադրությանը և պայքարո՞ւմ է Արցախի համար, թե՞ ոչ: