«Չեմ կարծում՝ հրաժարականի անհրաժեշտություն կա». Վիլեն Գաբրիելյան

ԱԺ ՔՊ խմբակցության պատգամավոր Վիլեն Գաբրիելյանն «Առաջին լրատվական»-ի հետ զրույցում լրագրողի՝ Գեղարքունիքի մարզի N զորամասի կացարանում տեղի ունեցած հրդեհի մասին հետևյալ դիտարկմանը՝ «երկու տարի իշխանությունը խոսում է բանակում բարեփոխումների մասին, սակայն ականատես ենք, որ տաքանալու համար բենզինով վառարան են վառում», պատասխանել է. «Չեմ ուզենա խնդիրը գնահատել մեկ դրվագով, այն պետք է գնահատել համակարգային: Իսկ համակարգային առումով մենք մեր բազմաթիվ գերատեսչություններում ունենք խնդիրներ, որովհետև փաստացի ՀՀ ստեղծման օրվանից մինչ այս պահը մենք չենք կայացրել մեր ինստիտուտներն այնպես, որ աշխատեն արդյունավետ: Երբ մեզ մոտ չի գործում համակարգը, մենք ունենում ենք անհատական դեպքեր, որոնց մեղավորը կարող է մի դեպքում լինել համակարգը, մեկ այլ դեպքում՝ անձն իր անփութության պատճառով»,- ասել է նա:

Ըստ իշխանական պատգամավորի՝ յուրաքանչյուր նախարար կրում է քաղաքական պատասխանատվություն այն դեպքերի համար, որոնք տեղի են ունենում իրենց ղեկավարած գերատեսչություններում. «Այս դեպքում, ինչպիսին պետք է լինի քաղաքական պատասխանատվությունը, նախ և առաջ Պաշտպանության նախարար Սուրեն Պապիկյանի անձնական որոշելիքն է, այս դեպքի հետ կապված ես չեմ կարծում, որ հրաժարականի անհրաժեշտություն կա, բայց ինձ համար շատ հստակ է, որ նա ինչ-որ չափով պետք է վերանայի իր մոտեցեումները և գուցե լինի շատ ավելի խիստ ու կտրուկ իր գործողություններում»,- նշել է Գաբրիելյանը: