«Սա «դաս» է բոլոր դատավորների համար, որ՝ չխոսեք, սուս ու փուս տեղներդ նստեք». Ռուբեն Մելիքյան

Այսօր «Իրավական տեռոր՝ կենսական վտանգների շեմին» քննարկման ընթացքում իրավապաշտպան Ռուբեն Մելիքյանն անդրադարձել է դատավոր Զարուհի Նախշքարյանի վերաբերյալ վերջին՝ չորրորդ կարգապահական վարույթին. «Իմ պատկերացմամբ այստեղ ոչ միայն խնդիր ունեն ձերբազատվելու Զարուհի Նախշքարյանից և դադարեցնել նրա լիազորությունները, այլ այն «դաս» է մյուս դատավորների համար, որ՝ չխոսեք, սուս ու փուս տեղներդ նստեք, որովհետև դուք կասկած եք հայտնում մեր «սրբազան» որոշումների նկատմամբ»,- նման տեսակետ է հայտնել իրավապաշտպանը:

Հիշեցնենք՝ փետրվարի 5-ին Արդարադատության նախարարությունը դիմել է Բարձրագույն դատական խորհրդին՝ դատավոր Զարուհի Նախշքարյանին կարգապահական պատասխանատվության ենթարկելու հերթական միջնորդությամբ։ Միջնորդության փաստական հիմքը դատավորի հրապարակային խոսքն է, որով նա «իր դրական վերաբերմունքն է արտահայտել դատավոր Աննա Փիլոսյանի առնչությամբ» և, ըստ արդարադատության նախարարի, հրապարակայնորեն կասկածի տակ է առել դատավոր Ա. Փիլոսյանի վերաբերյալ ԲԴԽ դատական ակտը։