«Համեր»-ի 25-ամյա վարորդը 44-օրյա պատերազմի մասնակից է եղել

Հանրապետության հրապարակում երեկ ուշ երեկոյան «Համեր» մակնիշի մեքենայի՝ պարեկներին չենթարկվող, երթևեկության կանոնները կոպիտ խախտող վարորդը՝ Արարատ քաղաքի բնակիչ 25-ամյա Գեղամ Սահրադյանը, 44-օրյա պատերազմի մասնակից է եղել։

Համաքաղաքացիներից մեկի խոսքով՝ Գեղամը պատերազմի ժամանակ նաև շրջափակման մեջ է հայտնվել է, երկար ժամանակ արգելել էին մեքենա վարել, այդ օրն էլ մեքենան փախցրել էր ու գնացել: Այս մասին գրում է «Ինֆոպորտ»-ը:

Հիշեցնենք, որ փետրվարի 10-ին, ժամը 23.30-ի սահմաններում, «Համեր» մակնիշի մեքենայի վարորդը հանդիպակաց երթևեկել է Աբովյան փողոցում, չի ենթարկվել ոստիկանության ծառայողների «Կանգ առ» ազդանշանին, մեքենան վարել է հետիոտնի համար նախատեսված մասով, վրաերթի է ենթարկել պարեկի, դիտավորյալ հարվածել և վնասել է պարեկային՝ 3 և քաղաքացիների՝ 8 մեքենաներ։ Այդ ամենը կանխելու և մեքենայի ընթացքը կանգնեցնելու նպատակով գործադրվել է հրազեն «Համերի» անվադողերի ուղղությամբ։ Վարորդը թողնելով մեքենան Ագաթանգեղոսի փողոցի շենքերից մեկի կամարանցման տակ՝ դիմել է փախուստի, այնուհետև հայտնաբերվել է Խորենացու փողոցում և ձերբակալվել։

Ձերբակալվածի անձնական խուզակությամբ հայտնաբերվել է «մեթամֆետամին» տեսակի թմրանյութի նմանվող բյուրեղանման զանգված: Նախնական տվյալներով վերջինս եղել է թմրանյութի ազդեցության տակ։