«Ամենաուժեղ պետությունները նրանք են, որոնց համար հանրության անվտանգությունը պետության թիվ մեկ խնդիրն է». Հովհաննես Ավետիսյան

Հանրային կառավարման մասնագետ Հովհաննես Ավետիսյանը ֆեյսբուքյան իր էջում գրել է․ «2011-ի մարտին Ճապոնիայում երկրաշարժ է գրանցվում, որը մինչ օրս այնտեղ գրանցված ամենաուժեղն է եղել: Սրա հետևանքով Ֆուկուշիմայի ատոմակայանը վնասվում է, պետությունը ստիպված է լինում շատ արագ տեղահանել շուրջ 150,000 մարդ: Ատոմային վթարը այնքան մեծ է, որ դասվում է Չերնոբիլի վթարի մակարդակին ու համարվում է աշխարհում գրանցված ատոմային աղետներից երկրորդ մեծը: Վթարը այնքան մեծ է, որ հետևանքները վերացվելու են շուրջ 40 տարի:
Հիմա ուշադիր, աղետի անմիջական ազդեցության պատճառով ոչ ոք չի մահացել: Մահացել է մեկ հոգի աշխատակից տարիներ անց՝ թոքերի քաղցկեղից, որ ասում են այս վթարից առաջացած ճառագայթման հեևանք է:
Հիմա սա համեմատեք Թուրքիայի երկրաշարժի հետևանքով առաջացած ծանր ու քաոտիկ վիճակի հետ: Կամ համեմատեք մեզ մոտ եղած երկրաշարժի կամ ցանկացած այլ ճգնաժամային վիճակի կառավարման հետ, այդ թվում պատերազմ:
Ամենաուժեղ պետությունները նրանք են, որ շատ լավ են կազմակերպված և հանրության անվտանգությունը պետության թիվ մեկ խնդիրն է: Իսկ սա ունենալու միակ եղանակը կրթությունն ու գիտությունն են: Մենք մեր ներկա պետական կառավարման որակներով հանգիստ կարող ենք դասվել աշխարհի ամենավատ երկրների շարքում:
Ու սա է պատճառը, որ մինչ օր աղետների լուրերը դիմավորում ենք՝ Աստված մի արասցե մեզ մոտ լինի ձևակերպմամբ: Այնինչ ժամանակակից գիտությունը թույլ է տալիս կյանքդ բախտի (հավանականության) քմահաճույքին չթողնել և ռիսկերը դարձնել կառավարելի, որը մենք մինչ օրս նույնիսկ չենք էլ փորձում անել»: