Հունաստանի տրանսպորտի նախարարը հրաժարական է տվել

Հունաստանի ենթակառուցվածքների և տրանսպորտի նախարար Կոստաս Կարամանլիսը հայտարարել է իր հրաժարականի մասին ուղևորատար գնացքի վթարից հետո:

Նախարարի հայտարարությունը տարածել է Հունաստանի կառավարության մամուլի ծառայությունը. «Ես հրաժարական եմ տալիս ենթակառուցվածքների և տրանսպորտի նախարարի պաշտոնից: Ես իմ պարտքն եմ համարում դա անել՝ որպես հարգանքի նվազագույն նշան այն մարդկանց հիշատակի նկատմամբ, ովքեր այդքան անարդարացիորեն հեռացան կյանքից և ինձ վրա եմ վերցնում պատասխանատվությունը Հունաստանի պետական ​​ու քաղաքական համակարգի անվերջ սխալների համար: Մենք Հունաստանի երկաթգծային ցանցն ընդունել ենք ոչ բարվոք վիճակում: Այս 3,5 տարվա ընթացքում բոլոր ջանքերը գործադրել ենք այս իրողությունը բարելավելու համար, ցավոք սրտի, այդ ջանքերը բավարար չէին նման վթար կանխելու համար, և դա շատ դժվար է բոլորիս և անձամբ ինձ համար»։
Նրա խոսքով՝ նման ողբերգությունից հետո անհնար է շարունակել ապրել այնպես, կարծես երբեք դա չի եղել։
Հիշեցնենք, որ մարտի 1-ի գիշերը հունական Տեմպի քաղաքում՝ Լարիսա քաղաքից ոչ հեռու, բախվել են երկու գնացք՝ բեռնատար և մարդատար։ Վերջին տվյալներով՝ զոհվել է 40, վիրավորվել՝ 80-ից ավելի մարդ։ Հունաստանի վարչապետ Կիրիակոս Միցոտակիսը եռօրյա համազգային սուգ է հայտարարել: