«Դատարանի որոշումը չկատարելու դեպքում «միջազգային հանրությունը» պատժամիջոցի չի ենթարկի Ադրբեջանին». Հակոբ Բադալյան

Քաղաքական մեկնաբան Հակոբ Բադալյանը գրում է. «Հաագա, Հաագա, «քանի՞՝ ախպեր, գնա ու գա»:
Պետք չէ լինել մոլորության մեջ, կամ՝ կամա, թե ակամա մոլորեցնել հանրությանը, թե դատարանի որոշումը չկատարելու դեպքում «միջազգային հանրությունը» պատժամիջոցի կենթարկի Ադրբեջանին:
«Միջազգային հանրությունը», այն է՝ եվրոատլանտյան բևեռը, պատժամիջոց կիրառում է մի դեպքում, երբ որևէ մեկի գործողությունը վտանգում է կամ անմիջապես հարվածում միջազգային անվտանգությունը, այլ կերպ ասած՝ եվրոատլանտյան անվտանգությունը:
Ալիևն այսօր այդ անվտանգության «մատակարարներից» մեկն է, ոչ թե սպառնալիք:
Այս իրավիճակին «վարդագույն շղարշ» քաշելը չի կարող օգտակար ու արդյունավետ լինել Հայաստանի ու Արցախի համար: Ընդհանրապես, պետք չէ քաշել որևէ գույնի շղարշ, լինի վարդագույն, թե մոխրագույն: Պետք է նայել իրականությանն այն գույներով, որ կա, որովհետև դա մեզ ցանկալի «գունային գամմայի» հասնելու արդյունավետ աշխատանքի նախադրյալը»: