«ՀԱՊԿ-ից դուրս գալ-չգալու թեման համարում եմ «սիզիփոսյան» թեմա». Հակոբ Բադալյան

Քաղաքական մեկնաբան Հակոբ Բադալյանը գրում է. «ՀԱՊԿ թեմային անդրադարձել եմ բազմիցս, անգամ այն ժամանակ, երբ Հայաստանում միակ տրենդային թեման «թավիշ-չթավիշն» էր: Դեռեւս այդ ժամանակ նշել եմ, որ ՀԱՊԿ որպես այդպիսին ինքը գտնվում է աշխարհաքաղաքական տրանսֆորմացիաների, միջազգային ու մասնավորապես եվրասիական անվտանգության ճարտարապետության՝ հասունացող հիմնարար վերափոխումների ազդեցության ներքո, ու այդ հանգամանքը թողել, ու ժամանակի ընթացքում իր ավելի մեծ ազդեցությունն է թողնելու ՀԱՊԿ ներքին հարաբերությունների վրա, եւ ոչ միայն Հայաստանի հարցում:
Այսօր մենք դա տեսնում ենք նաեւ Կիրգիզիա-Տաջիկստան պարագայում, որը բոլորովին էլ լոկ էդ երկու երկրների հարաբերության հարց չէ:
Այդ համատեքստում էլ, այսօր ՀԱՊԿ-ից դուրս գալ-չգալու թեման համարում եմ ըստ էության՝ «սիզիփոսյան» թեմա:
Բայց, դրանով հանդերձ, երբ լսում եմ կարծիք, թե այստեղ ՀԱՊԿ-ն է Ադրբեջանին հակադրվող միակ ուժը, հազիվ եմ հակադրվում ծիծաղելու ցանկությանը»: