«Մենք հնազանդ սպասում ենք, թե ե՞րբ վերջապես կանջատեն արհեստական շնչառական ապարատը». Ն. Զոհրաբյան

ԱԺ նախկին պատգամավոր Նաիրա Զոհրաբյանի գրառումը. «Այս օրերին Ֆրանսիայում ընդդեմ թոշակի անցնելու տարիքը բարձրացնելու դեմ ցույցերին մասնակցում է մեկ միլիոնից ավելի մարդ։ Մարտի 7-ի ցույցին, որին ես ևս մասնակցել եմ, հասկանալու համար, թե իր սոցիալական խնդիրը, իր կրուասանի հարցը լուծելու համար ինչի՞ է պատրաստ եվրոպացին, ասեմ, որ միայն Փարիզում ցույցին մասնակցում էր կես միլիոն մարդ, իսկ ողջ Ֆրանսիայում այդ օրը ցույցին մասնակցել է 1.4 միլիոն մարդ։ Գնացքների և մետրոների գործադուլները պարբերաբար շարունակվում են: Ցուցարարները փակել են խոշոր նավթային ընկերությունների մուտքերն ու ելքերը, որ դիզվառելիքով ոչ մի մեքենա դուրս չգա և վաղվանից արդեն կսպառվեն նաև դիզվառելիքի պաշարները։
Այս միլիոնանոց կատաղի հերոսամարտը, հիշեցնեմ, ընդամենը նրա համար է, որ ֆրանսիացիներն ուզում են շուտ գնալ թոշակի, վայելել իրենց հանգիստն ու դեմ են աշխատանքային տարիքը ևս 3 տարով երկարաձգելուն, ինչը Մակրոնի առաջարկած ռեֆորմն էր։
Ինչի՞ եմ սա պատմում։ Անկեղծ՝ չգիտեմ։
Երևի, որ Արցախը արդեն 3 ամիս բլոկադայի մեջ է ու մենք ոչինչ չենք անում, Ալիևի աշխատակազմի ղեկավարը Արցախի ներկայացուցիչներին հրավիրում է Բաքու՝ քննարկելու, թե ադրբեջանական կանաչ անձնագրերը վերաինտեգրման ո՞ր փուլում է հարմար տալ արցախցիներին, ու մենք էլի ոչինչ չենք անում։
Մենք հասցվել ենք կլինիկական մահվան փուլին և հնազանդ սպասում ենք, թե ե՞րբ վերջապես կանջատեն արհեստական շնչառական ապարատը, որ ոչ մեկս, որպես թարմ մեռել, այլևս ոչ մի պարտավորություն ու պատասխանատվություն չունենանք Արցախի ու Հայաստանի հանդեպ»։