«Մեզանում ներդրվել է «մտածողական մազոխիզմի» մի տեսակ». Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրում է. «Մեզանում ներդրվել է «մտածողական մազոխիզմի» մի տեսակ, երբ, օրինակ, մեր հանդեպ ուժային որեւէ խաղացողի քաղաքական ոչ շահեկան, անբավարար վարքագծի պարագայում «մեղքը» անմիջապես վերցնում ենք մեր վրա:
Օրինակ, Ռուսաստանը չի՞ կատարում իր դաշնակցային պարտավորությունը, կամ իրեն չի՞ պահում այնպիսի դաշնակցային վարքի շրջանակում, որ կբավարարեր մեզ, առաջանում է հետեւյալ արձագանքը Հայաստանում՝ «փչացնում ենք հայ-ռուսական հարաբերությունը, արեւմտամետությամբ գնում ենք մեր դաշնակցի դեմ, բա ի՞նչ ենք ուզում»:
Կամ, Արեւմուտքը չի բավարարում մեր արդարացի հարցադրումները, Ադրբեջանի հանդեպ խիստ չէ՝ ինչի հիմքերը միանգամայն բավարար են, եւ մեզանում միանգամից սկսում է՝ «բա ուզում եք Ռուսաստանի դաշնակից մնաք, Արեւմուտքը օգնի՞», եւ նման բաներ:
Ես միանգամայն հեռու եմ մեր սեփական պատասխանատվությունն այլոց վրա տարածելու մտայնությունից: Մեր հաջողության ամուր հիմք կարող է լինել այն, որ ցանկացած հարցի համար պատասխանատու դիտարկենք ինքներս մեզ: Բայց, դա չի նշանակում, որ պետք է զբաղվենք ինքնախարազանումով, թե սրան կամ նրան հավատարմության այդքան էլ համոզիչ երդում չենք տվել, դրա համար չենք ստացել պատասխան:
Սեփական պատասխանատվությամբ աշխատանքը չպետք է դիտարկվի «համոզիչ երդումի» ինքնախարազան տրամաբանությամբ: Հայաստանը գտնվելով չափազանց բարդ ռեգիոնում, ունենալով չափազանց ծանր խնդիրներ, փորձում է առավելագույն բազմակողմանիությամբ աշխատել թե մեկ, թե մյուս ուղղությամբ, եւ այլ ուղղություններով: Սա ակնառու է: Այդ աշխատանքի որակը, բովանդակությունը իհարկե պետք է լինի թե քննադատության, թե ինքնաքննադատության ենթակա, բայց ընդհանուր իրավիճակը պետք է դուրս բերենք ինքնախարազանման մտածողությունից եւ հոգեբանությունից»: