Երեքշաբթի, 21 ապրիլի, 2026 թ.
|
Ստեփանակերտում`   +6 °C

Մեղադրողը միջնորդում է Վազգեն Մանուկյանի նկատմամբ 500 հազար դրամ տուգանք կիրառել

Մեղադրողը միջնորդում է Վազգեն Մանուկյանի նկատմամբ 500 հազար դրամ տուգանք կիրառել
192
Երկուշաբթի, 17 ապրիլի, 2023 թ., 21:06

Վազգեն Մանուկյանի գործով այսօրվա դատական նիստին դատախազ Արմեն Գևորգյանը մեղադրական ճառի ժամանակ միջնորդեց պատերազմից հետո ստեղծված ընդդիմադիր «Հայրենիքի փրկության շարժումը» առաջնորդած ընդդիմադիր գործչին տուգանել նվազագույն աշխատավարձի 500-ապատիկի չափով: Այս մասին հայտնում է «Ազատությունը»:

77-ամյա Մանուկյանը մեղադրվում է իշխանությունը զավթելուն և սահմանադրական կարգը բռնի տապալելուն ուղղված հրապարակային կոչերի համար։ Ընդդիմադիր գործիչը, սակայն, չի ընդունում իրեն առաջադրված մեղադրանքը:

Դատախազը հայտնեց, որ պատիժը մեղմացնող հանգամանք են եղել Մանուկյանի տարիքը, նախկինում նրա զբաղեցրած պաշտոնները:

Արմեն Գևորգյանը դատարանից նաև պահանջեց մինչ դատավճռի հրապարակումը անփոփոխ թողնել ամբաստանյալի նկատմամբ կիրառված խափանման միջոցը՝ ստորագրությունը չհեռանալու մասին:

Մինչ մեղադրող կողմը հայտարարում է, թե մեղադրանքն ապացուցված է, պաշտպանական կողմը պնդում է՝ Մանուկյանի հայտարարությունները չեն կարող համարվել իշխանությունը զավթելուն և սահմանադրական կարգը բռնի տապալելուն ուղղված հրապարակային կոչեր: Ըստ պաշտպան Էրիկ Ալեքսանյանի՝ դրանք բռնության ուղերձներ չեն, այլ քաղաքական քննադատություն:

Պաշտպանական կողմը խնդրեց արդարացնել Վազգեն Մանուկյանին։

Նիստը հետաձգվեց, հաջորդը նշանակվեց ապրիլի 29-ին։