Բայրամովն ԱՄՆ պետքարտուղարի օգնականին դժգոհել է, որ Հայաստանը չի պատասխանում Ադրբեջանի առաջարկներին

Հայաստանն արդեն վեց շաբաթ է, ինչ չի արձագանքում խաղաղության համաձայնագրի տեքստի վերաբերյալ Ադրբեջանի վերջին առաջարկներին։ Այս մասին հայտարարել է Ադրբեջանի արտգործնախարար Ջեյհուն Բայրամովը՝ ընդունելով ԱՄՆ պետքարտուղարի Եվրոպայի և Եվրասիայի հարցերով օգնականի տեղակալ Էրիկա Օլսոնին։

Միևնույն ժամանակ, հակառակորդ երկրի ԱԳ նախարարը նշել է, որ չնայած վստահության ամրապնդման միջոցառումներին, «ինչպիսիք են, մոլորված և Ադրբեջան անցած հայ զինվորների վերադարձը կարճ ժամանակում, Հայաստանում ադրբեջանցի զինվորների նկատմամբ վերջին բռնությունները այդ երկրի դիվերսիոն գործունեության օրինակ են»:

Իր հերթին Օլսոնը նշել է տարածաշրջանում խաղաղության և կայունության հաստատման կարևորությունը, ինչը պահանջում է խաղաղության համաձայնագրի ստորագրում։ Նա ընդգծել է, որ ամերիկյան կողմը միշտ պատրաստ է աջակցել Ադրբեջանի և Հայաստանի միջև երկկողմանի հիմքով անցկացվող բանակցություններին։