Իրանին մտահոգում է, որ հայկական կողմը չի հասկանում՝ ինչ է ռազմավարական հարաբերությունը. իրանագետ

Ադրբեջանն իր գործողությամբ ցույց է տվել, որ մտադիր է տարածաշրջանում ճնշումներ գործադրելով իր նպատակներին հասնել և վերջին շրջանում իր բոլոր գործողությունները դրան են ուղղված: «Փաստինֆոյի» եթերում ասել է իրանագետ Հարութ Առաքելյանը:

«Կարծում եմ, ադրբեջանական կողմը մտադիր է Իրանին համոզել, որ Ռաշթ-Աստարա՝ 160 կմ-ոց երկաթգիծը, որը երկար տարիներ Իրանն առկախած է պահել և չի կառուցում, խոչընդոտել՝ Հյուսիս-Հարավի հետ կապված պլանները հետաձգել, մինչև կարողանա իր ուղղությամբ Հյուսիս-Հարավը կյանքի կոչի»,- նշեց իրանագետը:
Անդրադառնալով իրանա-իսրայելական հնարավոր պատերազմին՝ բանախոսը նշեց, որ Իրանին հարվածելը այդքան էլ հեշտ չէ, քանի որ Իրանը հսկայական ռազմավարական խորություն ունի, ուստի Իսրայելը փորձում է տարածաշրջանում անջատողական նկրտումները ակտիվ պահել: Իրանը ունի պրոքսի բազմաթիվ խմբավորումներ, որոնց միջոցով կարող է պատասխանել Իսրայելին՝ Սիրիայում, Լիբանանում, Հորդանանում և այլն: Վերջին շրջանում, անգամ ամերիկյան կողմն է փորձում Իսրայելին սանձել:

Իրանագետի կարծիքով, Իսրայելին հետաքրքրում են Իրանի բոլոր հարևանները: Եթե Հայաստանում մտածում են, որ Իրան-Ադրբեջան հարաբերությունների սրումը լավ է, ապա չարաչար սխալվում են: Մեր ազգային անվտանգության շահերից է բխում, որ Իրանի և Ադրբեջանի հարաբերությունները մեղմ լինեն։ Նա ուշադրություն է հրավիրում Իրանի հայտարարությանն առ այն, որ Հայաստանի տարածքային ամբողջականությունն իր համար կարմիր գիծ է և նման պարագայում Ադրբեջան-Իսրայելը ցանկանան հարված հասցնել Իրանի իմիջին: Բնական է, որ ուղղակի չեն կարող Իրանին հարվածել, ուստի պիտի հարվածեն Իրանի շահերին:

Բանախոսը նշեց, որ տարածաշրջանում Արևմուտքի նպատակները հիմնականում Ռուսաստանի և Իրանի ազդեցությունների չեցոքացումն է: Արևելք-Արևմուտք առճակատման արդյունք է նաև Հայաստանի վրա ճնշումներ բանեցնելը, որովհետև հիմնականում Ռուսաստանի և Իրանի պատժամիջոցները շրջանցվում են Հայաստանով: Իհարկե, կան նաև այլ երկրներ, որոնք օգնում են շրջանցել այդ պատժամիջոցները:

«Իրանին մտահոգում է, երբ տեսնում է, որ հայկական կողմը չի հասկանում, թե ինչ է ռազմավարական հարաբերությունները: Եթե թշնամին մտում է քո միջազգայնորեն ճանաչված սահման և ամեն օր առաջ է գալիս, իսկ դու ոչինչ չես անում՝ դա մտահոգում է Իրանին: Իրանը սա դիտարկում է որպես թակարդ, որ ավելի մեծ պատերազմի մեջ ներքաշեն իրեն, քանի որ ո՛չ Հայաստանը, ո՛չ Ադրբեջանը այն ներուժը չունեն, որ Իրանի համար սպառնալիք լինեն»,- եզրափակեց իրանագետը:

Մանրամասները՝ տեսանյութում: