«Խոսվում է նոր սպասվող, անկանխատեսելի, ծանր իրադարձությունների մասին». Տիգրան Աբրահամյան

«Գրիգորի Խաչատուրովը այն զինվորականներից է եղել, որ մինչև վերջ, բոլոր պայմաններում սպային բնորոշ վարքագիծ է դրսևորել, ինչը, բնականաբար, չէր կարող ընդունելի լինել այս իշխանության համար»,- Հակակոռուպցիոն դատարանի դիմաց, լրագրողների հետ զրույցում ասել է ԱԺ «Պատիվ ունեմ» խմբակցության քարտուղար Տիգրան Աբրահամյանը՝ պատասխանելով հարցին, թե արդյոք ի՞նչ խնդիր են լուծում իշխանությունները՝ մեկուսացնելով գեներալ Խաչատուրովին:

Անդրադառնալով վաշինգթոնյան բանակցություններին և դրանց արդյունքներին, Աբրահամյանն ասաց. «Մեծ առումով, Վաշինգթոնում տեղի ունեցած բանակցությունները, ըստ էության, ցույց տվեցին, որ որևէ արդյունք չի եղել: Դրան հաջորդած ժամանակահատվածում՝ Թուրքիայից, Ադրբեջանից և Հայաստանից հնչեցրած մեկնաբանությունները ցույց են տալիս՝ ոչ միայն ռեալ արդյունք չի եղել բանակցություններում, ավելին՝ կողմերը որոշակի զգուշավորությամբ, բայց խոսում էին նոր սպասվող, անկանխատեսելի, ծանր իրադարձությունների մասին»: