«Բոլորովին հեռու եմ մտքից, թե Քիշնևը հայկական կողմի համար օրորոց է, բայց այնտեղ կա մի էական բան». Հ. Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրում է. «Թե բա՝ Ադրբեջանը Սոթքով ուզում էր տապալել Բրյուսելը: Կրկնեմ, Բրյուսելի հարթակը Ադրբեջանի համար հարմարավետ հարթակ էր: Եթե Ադրբեջանը Սոթքում ունեցել է այսպես ասած՝ մոտիկ հստակ թիրախ այդ իմաստով, ապա, ըստ իս, դա եղել է Քիշնևի հանդիպումը, կամ առնվազն այդ հանդիպման քաղաքական արժեքի նվազեցմանը հասնելը:
Ես բոլորովին հեռու եմ մտքից, թե Քիշնևը հայկական կողմի համար օրորոց է, բայց այնտեղ կա մի էական բան, որը խնդիր է ոչ միայն Ադրբեջանի համար՝ Ֆրանսիային Գերմանիայի միանալը: Իհարկե, ծիծաղելի կլինի մտածել, թե նրանք միանում են Հայաստանի շահերը պաշտպանելու համար: Փարիզի ու Բեռլինի գլխավոր խնդիրը Մակրոնը ձևակերպել է դեռևս ուկրաինական պատերազմի մեկնարկին՝ «եվրոպական սուվերենություն», կամ պարզապես՝ Եվրոպայում ֆրանս-գերմանական գերակայության պահպանում:
Նրանց աշխուժացումը հայ-ադրբեջանական հակամարտության ուղղությամբ, Հայաստանի համար բալանսավորող և խաղի տարածություն բացող գործոն է, իսկ Ադրբեջանի համար ստեղծում է «երկատման» մարտահրավեր՝ ամերիկա-բրիտանական ու ֆրանս-գերմանական շերտերի միջև»: