«Նիկոլը փորձում է զրոյացնել մեր հաղթանակները՝ Շարժումից ի վեր». Ն. Մկրտչյան

Մամուլի ազգային ակումբի նախագահ Նարինե Մկրտչյանը ֆեյսբուքյան իր էջում գրել է. «Նիկոլ Փաշինյանի՝ ղարաբաղյան հիմնախնդրի կարգավորման իր իսկ հռչակած «զրոյական կետը» փաստորեն 29․8 քառ․ կմ հայկական տարածքն էր․ այսինքն՝ այն, ինչ կար ղարաբաղյան Շարժումից առաջ։ Նիկոլը, փաստորեն, փորձում է զրոյացնել մեր հաղթանակները՝ Շարժումից ի վեր։ Եվ որովհետև պահպանել, կառուցել, բազմապատկել նրան չի հաջողվում, Փաշինյանը փորձում է ավերել։ Նիկոլ Փաշինյանը ոչ միայն սեփական ապաշնորհության, նեղմտության, անտեղյակության, վախկոտության, քաղաքական կարճատեսության և գավառականության գերին է դարձել, այլև մեզ ու մեր երկիրն է դարձրել այդ ամենի պատանդը։
Կա երեք տեսակ դատաստան՝ ժամանակակիցների դատաստանը, պատմության դատաստանը և Աստծո դատաստանը։ Նիկոլ Փաշինյանը այդ երեքից և ոչ մեկի գոյությանը չի հավատում։ Այդ իսկ պատճառով նա անկանգ առաջ է ընթանում՝ ավերելով մեր երկիրը, ցրիվ տալով հայոց հզոր պետականության ապագայի հանդեպ մեր երազանքներն ու հույսերը։
Նիկոլ Փաշինյանը ժամանակակիցների դատաստանից կարող է խուսափել, պատմության խարազանից ցավ չզգալ, բայց Աստծո դատաստանի առջև պատասխան է տալու՝ թիզ առ թիզ, զոհ առ զոհ մեր հայրենիքի կորուստների համար»։