ԱՄՆ պատժամիջոցներ նոր ցանկում կան նաև հայկական և ղրղըզական ընկերություններ

Միացյալ Նահանգները պատժամիջոցներ է սահմանել 7 տասնյակ ընկերությունների նկատմամբ: Դրանց թվում կան ոչ միայն ռուսական, այլև հայկական և ղրղըզական ընկերություններ. հայտնում է «Ազատություն»-ը:

Պատժամիջոցների ցանկում ռուսական ընկերություններից են ավիացիայի համար ռադիոկապի սարքավորումներ ստեղծող «ПРИМА» գիտաարտադրական ձեռնարկությունը, «Իժևսկի անօդաչու համակարգեր» գիտաարտադրական միավորումը, «Ստրելա», «Ռոստվերտոլ», «Պրոլետարսկի զավոդ», «Տեխմաշ», «Ուրալ» ընկերությունները և ևս մի քանի տասնյակ հիմնարկներ:

ԱՄՆ-ի առևտրի նախարարությունը որոշումը հրապարակել է մայիսի 19-ին՝ Հիրոշիմայում «Մեծ յոթնյակի» գագաթնաժողովի մեկնարկի օրը:

«Մեծ յոթնյակը» հայտարարել է, որ կշարունակի Ուկրաինայի վրա հարձակված Ռուսաստանի նկատմամբ սանկցիոն քաղաքականությունը:

Բացի այդ, պատժիչ միջոցներ կսահմանվեն նաև պատժամիջոցները շրջանցելու գործում Ռուսաստանին սատարող պետությունների, ֆիզիկական և իրավաբանական անձանց նկատմամբ:

Պատժամիջոցների ենթարկված ղրղըզական և հայկական ընկերությունների անունները դեռևս չեն հրապարակվել: