«Փաշինյանին միայն թվում է, որ դավաճանական փաստաթղթեր ստորագրելով՝ կարող է Արցախը հանձնել». Մետաքսե Հակոբյան

«Երբ 2018 թվականին ՀՀ-ում Նիկոլ Փաշինյանը զավթեց իշխանությունը, և իր թիմակիցները հայտարարեցին, որ իրենց հեղափոխությունն ավելի կարևոր է, քան արցախյան գոյամարտը, արդեն իսկ ակնհայտ էր՝ սկսվել էր Արցախի հանձնումը: Բնականաբար, չէին կարող սուսուփուս իրականացնել. գործի դրվեց դավադիր պլանը, անհրաժեշտ էր պատերազմ: Թավշյա հեղափոխականները չխորշեցին, և զոհասեղանին դնելով հազարավոր մատաղ կյանքեր, իրագործեցին իրենց հայակործան պլանի մի մասը»,-Արցախի ԱԺ-ում հրատապ արտահերթ նիստի ժամանակ ասաց պատգամավոր Մետաքսե Հակոբյանը:

Անդրադառնալով Նիկոլ Փաշինյանի՝ այսօր ասուլիսի ընթացքում հնչեցրած՝ Արցախի վերաբերյալ մտքերին, Հակոբյանն ասաց. «Փաշինյանին միայն թվում է, որ նման հակահայ հայտարարություններով, կամ դավաճանական փաստաթղթեր ստորագրելով, կարող է Արցախը հանձնել Ադրբեջանին: Արցախի հանրապետության սահմանները արյունով են գծված, իսկ արյան հիշողությունն անջնջելի է»,- ասաց նա:

Շարունակելով խոսքը՝ Հակոբյանն ասաց. «Պարզից էլ պարզ է՝ Փաշինյանը կանգ չի առնելու և փորձելու է փլուզել մեր միասնականությունը, պետական ինստիտուտները, մեր անվտանգային համակարգը, ուստի Արցախի իշխանություններից պահանջում եմ՝ վերանայել և փոխել իրենց վարքագիծը, ամեն գնով ամրապնդել և պահպանել բոլոր պետական ինտիտուտները, ոչ թե խարխլել դրանց հիմքերը՝ դրանով ջուր լցնելով Նիկոլի ջրաղացին»:

«Կրկնում եմ՝ նա ով Արցախը տեսնում է Ադրբեջանի կազմում, նա պետական դավաճան է»,- հավելեց նա: