«Փաշինյանին երբեք չի կարելի արհամարհել, նրան պետք է միշտ հակադրվել». Վահրամ Մարտիրոսյան

Zangi-ի հիմնադիր Վահրամ Մարտիրոսյանը ֆեյսբուքյան իր էջում գրել է. «Փաշինյանի հետ ամեն ինչ պարզ է։ Եկեք հակառակ կողմն էլ նայենք, թե ինչ պատասխան են տալիս նրան։
Ընդիմադիր դարձած գեներալներից կամ ոչինչ չի լսվում կամ էլ առավելագույնը լսվում են «սուտա խոսում, ես հիվանդներին չեմ մեկնաբանում» ինֆանտիլ արտահայտություններ։ Օրինակ, Շուշիում գտնված և բոլոր հնարավոր բարձրաստիճան զինվորական պաշտոններ զբաղեցրած Սեյրան Օհանյանը չի կարողանում վերլուծական հոդված գրի Շուշիի անկման մասին, և ասում է, թե ապագայում քննիչները դրա պատասխանը կտան։ Բնական հարց է առաջանում՝ եթե իրեն պրոֆեսիոնալ զինվորական համարողը զինվորական գործի մասին կարծիք է սպասում ոչ զինվորական քննիչից, ապա միգուցե նա քննիչից ավելի՞ վատ զինվորական է։
Նիկոլը սուտ է խոսում, բայց խոսում է առարկայական սուտ։ Իր ուժը հենց դրա մեջ է։ Իսկ իրեն հակադրվում է կծկտուր, վերացական ու ինֆանտիլ միտքը։ Ու սա չի վերաբերվում միայն ռազմական ոլորտին, ցանկացած այլ ոլորտում նույն վիճակն է՝ Զրո առարկայական միտք, բայց փոխարենը դաշտում լցված անվերջ վերացական տրամաբանություններ։
Ստի ու պոպուլիզմի միակ հակաթույնը դա առարկայական բովանդակությունն է։ Փաշինյանին երբեք չի կարելի արհամարհել, նրան պետք է միշտ հակադրվել կոնկրետ փաստերի վրա հիմնված վերլուծություններով։
Քաղաքականության կանոնն է՝ Հաղթում է նա, ով հաղթում է բանավեճը։ Եթե դու չես էլ ցանկանում մասնակցել բանավեճին, ապա ո՞նց ես ցանկանում հաղթել Նիկոլին»։