Ինչո՞ւ է Կարեն Անդրեասյանը հայտնվել ԱԱԾ-ի թիրախում. «Հրապարակ»

«Հրապարակ»-ը գրում է. «ԱԱԾ-ն նախօրեին հաստատեց, որ ԲԴԽ նախագահ Կարեն Անդրեասյանի վերաբերյալ եղած հրապարակումներում առկա տեղեկություններն ուսումնասիրվում են գլխավոր դատախազի տեղակալի գրության հիման վրա: Մինչ այդ, մի քանի օր կայքերը գրում էին, որ ԱԱԾ-ում Անդրեասյանի նկատմամբ քրեական վարույթ կա՝ պաշտոնեական լիազորությունների չարաշահման դեպքով։
Մեր աղբյուրներն ասում են, որ ԱԱԾ-ից Կարեն Անդրեասյանի դեմ գործողությունները կառավարում է ԱԱԾ տնօրենի տեղակալ Անդրանիկ Սիմոնյանը, ով մինչ ԱԱԾ գալը եղել է դատավոր և ստանձնել է դատական իշխանության կուրատորի դերը, բնականաբար, Փաշինյանի «դաբրոյով»։ Նա վարչապետի սիրելիներից է՝ ժամանակին ցուցմունք տվեց Ռուբեն Վարդազարյանի դեմ և արագ թռիչքով հասավ ԱԱԾ։

Ըստ լուրերի՝ Սիմոնյանը նաև անձնական խնդիր ունի՝ ինչ-որ հարցով դիմել է Անդրեասյանին, մերժվել և հայտարարել, որ նա արժանանալու է Ջհանգիրյանի ճակատագրին։ Համակարգի մեր աղբյուրները չեն բացառում նաև, որ իշխանությունը փորձում է Կարեն Անդրեասյանին ավելի հնազանդեցնել, թեև սրանից ավելին երևի չի լինում»:

Մանրամասները՝ թերթի համարում: