«Չէր կարելի Հայաստանը դարձնել Ռուսաստանի ֆորպոստ՝ հույս ունենալով, որ նա կապահովի Հայաստանի ու Արցախի անվտանգությունը». Ոսկան Սարգսյան

Լրագրող Ոսկան Սարգսյանի ֆեյսբուքյան գրառումը. «Հայաստանի և Արցախի ներկայիս ծանր վիճակը Հայաստանի Հանրապետության՝ որպես անկախ պետության կայացած չլինելու, քաղաքական, տնտեսական, զինվորական-իրավապահ, մտավոր, հոգևոր, էլիտաների բացակայության հետևանք է։ Նիկոլ Փաշինյանի՝ իշխանության բերվելն այս ամենի հետևանք է, այն իր հերթին առաջացրեց ծանր հետևանքներ։ Քաղաքական էլիտայի փոխարեն մենք ունենք քաղաքական, կուսակցական թայֆաներ, տնտեսական էլիտայի փոխարեն՝ օրվա իշխանությանը կից մի խումբ օլիգարխներ, զինվորական-իրավապահ էլիտաների փոխարեն՝ Տիզբոնից շքանշաններ ստացող գործակալներ, կամ ազդեցության գործակալներ․ մտավոր էլիտայի փոխարեն՝ իշխանական կերակրատաշտին մոտ կանգնած, այդ իշխանություներից արտոնություներ, կոչումներ մուրող «մտավորականներ», հոգևոր էլիտայի փոխարեն՝ աղանդի նմանվող փակ կառույց։ 30 տարի առաջ երկիրը սխալ ռելսերի վրա է դրվել, չէր կարելի Հայաստանը դարձնել Ռուսաստանի ֆորպոստ, հույս ունենալով, որ Ռուսաստանը կապահովի Հայաստանի ու Արցախի անվտանգությունը, պատմությունը մեզ դաժանորեն պատժել է ուրիշների հետ անհիմն հույսեր կապելու համար։
Ազգի, պետության վերածնունդը սկսվելու է հանրակրթության և մշակույթի վերափոխումից, քաղցկեղի նման չարիք դարձած խաղամոլության ու թմրամոլության դեմ խիստ պայքարից։ Հայաստանում խոր ճգնաժամ է, իսկ մեզ շրջապատող տարածաշրջանում մեծ զարգացումներ են ընթանում, որոնցից մենք չենք կարող մեկուսացած մնալ։ Մինչև այս տարեվերջ փոփոխություններ են սպասվում, բոլորիցս է կախված՝ կամ կբռնենք ծնկած վիճակից դուրս գալու ուղին կամ՝ կգնանք պետությունը կորցնելու ճանապարհով»։