«Ալիևը մի հարցում իրավացի է». Տաթևիկ Հայրապետյան

ԱԺ նախկին պատգամավոր, ադրբեջանագետ Տաթևիկ Հայրապետյանը ֆեյսբուքյան իր էջում գրում է. «Լաչինի միջանցքից 20 տարեկան հայ տղայի են առևանգել։ Ալեն Սարգսյանը ռուս խաղաղապահների միջնորդությամբ ուղևորվում էր Երևան՝ ուսման նպատակով։ Կան դեռևս չհաստատված տեղեկություններ ևս երկուսի առևանգման մասին։
Ալիևը մի հարցում իրավացի է՝ մենք հասկանալու հետ կապված խնդիրներ ունենք։ Մենք չենք ուզում հասկանալ Ադրբեջանի հայատյացության մակարդակը, մենք ոչինչ չհասկացանք, երբ Կարմիր Խաչի ձեռքից առևանգեցին Վագիֆ Խաչատրյանին, մենք չենք հասկանում, որ Ադրբեջանը մեզ բոլոր առումներով քայքայելու քաղաքականություն է վարում, մենք չենք հասկանում, որ գերբի, դրոշի ու անկախության հռչակագրի մեջ խնդիրներ գտնելու փոխարեն պետք է աշխատել անդադար ու անհոգնել թե՛ դիվանագիտական, թե՛ ռազմական ու թե՛ տեղեկատվական հարթակներում, քանի որ Ադրբեջանի ախորժակը մենակ բացվում է...
Մենք չհասկացանք, որ երբ ՀՀ իշխանությունները որդեգրում են նվաստացման, միակողմանի զիջումների ու կենսական իրավունքներից հրաժարվելու քաղաքականությունը, դա ոչ միայն չի կանխում պատերազմը, այլ արագացնում է մեր անկումը...»: