Ֆրանսիան Հայաստանին նոր պատերազմի՞ է դրդում. ադրբեջանական լրատվամիջոցներ

Ըստ CBC TV Azerbaijan-ի՝ աճում է երկրների թիվը, որոնք ցանկանում են աշխարհաքաղաքական խաղացող դառնալ Հարավային Կովկասում։ «Նրանք, ովքեր շահ ունեն տարածաշրջանում, փորձում են իրենց տեղը գտնել հայ-ադրբեջանական խաղաղ բանակցություններում։ Որոշ ժամանակ առաջ հենց Ռուսաստանն էր չեզոք դեր խաղում այդ գործում։ Բրյուսելում հանդիպումներն ուժգնացրին այն զգացողությունը, որ հայ-ադրբեջանական խաղաղ համաձայնագրի կնքումը սարերի հետևում չէ, սակայն որոշ ժամանակ անց այդ գաղափարը երկրորդ պլան մղվեց Ֆրանսիայի շնորհիվ, որը դեմ է Կովկասում խաղաղությանը։ Պաշտոնական Բաքուն բազմիցս ասել է, որ այդ տարածաշրջանում ապրող հայերի հարցը Ադրբեջանի ներքին գործն է»։

Ադրբեջանական լրատվամիջոցներն անդրադառնում են նաև Ֆրանսիայի պաշտպանության նախարար Սեբաստիան Լեկորնյուի հայտարարությանը՝ Franceinfo-ի հետ զրույցում։ «Մեզ համար բացարձակ նպատակ է Հայաստանի ամբողջականությունը, ինքնիշխանությունն ու բնակչության պաշտպանությունը։ Մենք պաշտպանական առաքելություն ենք բացել երկրում»,- ասել է Լեկորնյուն։

Ըստ ադրբեջանական լրատվամիջոցների՝ Ֆրանսիան մտադիր է «ռազմական միջամտությամբ» պաշտպանել Հայաստանի տարածքային ամբողջականությունը։